描述
放假好多時大家都會同屋企人飲下茶。呢種一盅兩件，係熱騰騰既蒸籠尋寶既文化亦似乎受到世界各地鐘意❤️ 用點心做主題既桌遊以前坊間都有唔少，但真真正正能夠將一枱「港式」點心放係大家面前，睇得又玩得既桌遊，就一定要講早前由加拿大出版商係KS高額集資既「蒸蒸日上」（Steam Up) 莫屬～ 化身為食生肖，希望能夠食到最多既美食而係枱上進行一場究竟轉盤快定筷子快既點心爭奪戰🥢 遊戲屬於家庭遊戲類型，規則同流程都簡單，各人運用自己唔同既生肖能力，收集能換到點心既食物標記，或者移動中間既轉盤（方便自己起筷/阻撓對方）等。 遊戲最大賣點係，真正呈現蒸籠同點心既配件，完美精緻既3D蒸籠配上五大點心：燒賣、蝦餃、鳳爪、叉燒包同糯米雞，真係一款唔可以肚餓同深夜玩既遊戲🤤 但如果想同較細（10歲以下）既小朋友一齊玩，可能要注意有些卡牌上面文字都唔少，要從旁協助。
遊戲人數: 2-5
遊戲時長: 40 – 60 分鐘
